KVENNABLA&Eth;I&Eth;

Kerfisfræðingar þurfa skotvopn til að bregðast við tölvuárásum

Svona á að umgangast og vinna með tölvur. Í öryggisvesti og með hlífðarhjálm ef tölvan skyldi ráðast á þig.

Meiri áhersla verður lögð á netöryggi en sérþjálfuð netöryggissveit landsins verður færð frá Póst- og fjarskiptastofnun til ríkislögreglustjóra og starfssvið hennar víkkað út, samkvæmt frumvarpi sem innanríkisráðherra stefnir að því að leggja fram. 
 
Ráðamenn á fimmtugsaldri og eldri eru uggandi eftir tölvuárás á vefi stjórnarráðsins um helgina. Árásin varð til þess að enginn af þeim tveimur einstaklingum sem heimsækja vefina reglulega komst inn á þá og olli hún þeim því talsverðum óþægindum.
 
Við því verður að sjálfsögðu að bregðast og hafa ýmsar lausnir verið skoðaðar í þeim efnum. Sérfræðingur netöryggissveitar Íslands segir að ástandið í tölvuheiminum sé orðið þannig að nauðsynlegt sé að skotvopnavæða alla kerfisfræðinga landsins. Til tals hefur komið að allir kerfisfræðingar landsins og aðrir sem sjá um löggæslu á tölvukerfum fái skammbyssur en þær verða geymdar í læstum skrifborðsskúffum tölvunjarðanna. Þannig geta þeir brugðist við yfirvofandi tölvuárás sem fyrst áður en sérsveit netöryggisdeildar kemur á vettvang.
 
Þá er í frumvarpi innanríkisráðherra leiðir til að auka öryggi almennra borgara sem af einhverjum ástæðum gætu þurft að vinna nálægt tölvu. Innleitt verður í lög að allir sem eru í sama herbergi og tölva, snjallsími eða annað sem tölvuþrjótar geta notað til árása, þurfi að klæðast sérstöku öryggisvesti og vera með hjálm.
 
„Ef þú verður fyrir tölvuárás er nauðsynlegt að vera með hlífðarhjálm,“ segir Helgi Hrafn, þingmaður Pírata og tölvunjörður. „Öryggisvestið er svo til þess að auðveldara sé finna þig og "save´a" þér þegar þú ert flæktur í netinu.“

Hann telur þó að ekki sé hægt að fyrirbyggja alfarið svona árás í framtíðinni. „Þetta er eitthvað sem getur alltaf gerst í sjálfu sér og það verður aldrei hægt að fyrirbyggja þetta algjörlega. Þegar svona árásir eiga sér stað þá er mikilvægt að það sé gott viðbragð við því og þá getur skipt sköpum að kerfisfræðingurinn sem er fyrstur á vettvang hafi skotvopn til að skjóta skjáinn áður en hann smitar einhvern af vírus.“