KVENNABLA&Eth;I&Eth;

Björt framtíð var ekki með kosningaloforð heldur svona „kosninga bla bla bla“

„Nú er ég heilbrigðisráðherra og það breytir öllu. Kosningaloforðin voru meira svona fallegir hlutir til að segja sem hljómuðu vel.“

Óttarr Proppé, formaður Bjartrar framtíðar og heilbrigðisráðherra, gerði sérstaklega að umtalsefni á Alþingi í gær að Björt framtíð hefði reynt að gefa ekki kosningaloforð heldur kynna frekar svona óljósar hugmyndir sem gætu fallið kjósendum í geð í aðdraganda kosninga.

„Við vissum nokkurn veginn hvað það var sem fólk vildi heyra og sögðum það bara. Ég man það nú ekki allt saman núna en ég er nokkuð viss um að það að koma Sjálfstæðisflokknum og manni í Panama skjölunum til valda var eitt af því. Já ég er nokkuð viss um að við töluðum skýrt fyrir því í kosningabaráttunni að tryggja áframhaldandi sérhagsmunagæslu undir stjórn íhaldsins.“

Þetta kom fram í svari hans við fyrirspurn Loga Einarssonar, formanns Samfylkingarinnar, um uppfyllingu kosningaloforða Bjartrar framtíðar. Þá sagðist Óttarr ekki geta treyst sér til að lofa því að þingmenn Bjartrar framtíðar muni styðja sín helstu baráttumál ef stjórnarandstaðan kemur með þau inn í þingið.

„Ég veit við töluðum mikið gegn einhverju fúski og svona. Hinsvegar er það svo að við erum búin að lofa Sjálfstæðisflokknum ákveðnum hlutum, meðal annars í sambandi við ESB og önnur stór mál, og því getum við ekki svikið þá bara af því að við lofuðum kjósendum okkar einhverju öðru í október á síðasta ári. Það hefur svo margt breyst síðan þá.“