KVENNABLA&Eth;I&Eth;

Ný tölvubrotadeild lögreglunnar tekur brátt til starfa á Hrafnistu

Séð inn í kennslustofu.

Þjálfun nýju tölvubrotadeildar lögreglunnar er komin langt á leið en fyrsti árgangur lögreglunema sem sérstaklega munu glíma við tölvuglæpi mun útskrifast í vetur. Þegar ákveðið var að færa lögregluskólann til Akureyrar lá beinast við að færa menntun tölvubrotadeildar lögreglunnar á Hrafnistu þaðan sem flestir nýju lögreglumennirnir sem sinna munu tölvuglæpum koma.

Ólöf Nordal innanríkisráðherra og Illugi Gunnarsson menntamálaráðherra ákváðu í byrjun árs að ný tölvubrotadeild og þjálfun starfsmanna hennar muni vera á Hrafnistu en á dvalarheimili aldraðra er mikil tölvuþekking samankomin sem nýtast mun í baráttunni við tölvuglæpi. Margir þar hafa farið á yfirgripsmikil námskeið í notkun tölvupósts og Word.

Lögreglunemarnir eru þessa stundina að klára að kynna sér glænýjan hugbúnað sem birtir mjög öfluga pop-up glugga í tölvum notenda sem hugsanlega gætu verið að hugsa um að fremja svívirðilegan tölvuglæp. Brynjar Níelsson, alþingismaður og tímabundinn deildarstjóri tölvuglæpadeildar lögregluskólans segir að nýju lögreglumennirnir sem staðsettir verða á öldrunarheimilum muni hafa nægan tíma til að sinna verkefnum sínum sem aðallega snúast um að draga úr umfangi ólöglegs niðurhals á netinu á höfundarréttarvörðu efni.

„Það er ljóst að glæpamenn muni hugsa sig tvisvar um þegar þeir fá svona pop-up glugga upp á skjáinn. Ég kann ekki öll fræðin á bak við þetta en svona gluggar hafa þegar gefið góða raun þar sem þeir hafa verið notaðir, t.d á klámsíðunum.“