KVENNABLA&Eth;I&Eth;

Grönn kona finnst úti á landi

Húsavík þar sem granna konan sást fyrr í dag. Slíkt er afar sjaldgæft.

Grönn kona sást um hádegisbilið í dag Norðausturlandi. Þetta staðfestir Brynjólfur Björnsson, kvennaáhugamaður á Húsavík, sem komið hefur til Reykjavíkur og séð granna konu áður.

„Þetta var eins og girðingarstaur á vappi þarna á bílastæðinu við bensínstöðina. Mér þykir líklegt að hún hafi farið þangað inn til að kaupa Séð og Heyrt. Við seljum það þar,“ sagði Brynjólfur við fréttastofu en hann var í óða önn að hringja í alla félaga sína til að tilkynna þeim fundinn.

Afar sjaldgæft er að sjá konu í kjörþyngd úti á landi því konur þar eru svo solgnar í hrossabjúgu og feitt kjöt. Þær fáu sem sjást eru oftast ferðamenn sem koma frá fátækum Evrópulöndum eins og Frakklandi og Þýskalandi þar sem kjöt er erfðabreytt og næringarsnautt.

Brynjólfur sagði að nú væri unnið að því að setja þá aðila í viðbragðstöðu sem eiga að koma að svona máli, en til eru starfsreglur meðal einhleypra karlmanna úti á landi um viðbrögð þegar fréttist af álitlegri konu. Konan fór eins og áður sagði inn á bensínstöðina og kom út með tímarit. Hún virtist vera úti að skokka en Brynjólfur missti sjónar af henni þegar hún skokkaði í burtu þar sem hann er ekki léttur á fæti sjálfur.

„Það er dálítið óþægilegt að vita ekki hvar hún er núna. Ég hef heyrt að svona konur geti auðveldlega skokkað 50 km á dag. Það er þoka á svæðinu sem þýðir að konan getur verið kominn í einhvern sumarbústað sem við vitum ekki um.“

Einhleypir karlmenn á svæðinu munu nú fljótlega hefja leit á nýbónuðum bílum sínum í von um að geta heillað konuna upp úr skónum og sannfært um að giftast sér og flytja í plássið.

Að sögn Kristins Ársælssonar, upplýsingafulltrúa á svæðinu, sem stýrt hefur verkefni um að fjölga íbúum með fasta búsetu á svæðinu er mjög mikilvægt að konan finnist svo hægt sé að sýna henni góða mannkosti sem þarna búa. Þeir sem vita af ferðum konunnar á þessum slóðum eru beðnir um að láta lögregluna á Húsavík vita.