KVENNABLA&Eth;I&Eth;

Losar ítrekað eiturefni út að næturlagi

Græðgi og lélegar eftirlitstofnanir eru ástæða þess að Jón mengar eins og kísilverksmiðja á góðum degi.

Jón Gunnarsson hefur undanfarið losað hættuleg eiturefni út í andrúmsloftið. Hann hefur átt erfitt með meltinguna undanfarið vegna græðgi en eiginkona hans segir að hún hafi fyrst greint frá vandanum í nóvember þegar hún leitaði sér aðhlynningar vegna öndunarerfiðleika. „Maðurinn hámar í sig allskonar ógeð og ræður ekki við sig vegna græðgi. Svo vill hann ekkert gera í vandanum, segir þetta bara bull í mér.“

Eiginkona hans, Guðrún Hákonardóttir, birti í gær á Facebook myndband þar sem Jón sést hleypa eiturefnum út í andrúmsloftið í svefnherbergi þeirra hjóna í skjóli nætur. „Já það er eins og hann tappi af sér að næturlagi þegar hann heldur að ég viti ekki af því. Það er ekki líft inni í herberginu á meðan og löngu á eftir. Ég var með þarna kaktus í glugganum en hann er núna dauður,“ segir Guðrún.

Tugir nágranna þeirra hjóna hafa kvartað undanfarið við Umhverfisstofnun vegna lyktar og mengunar frá húsi þeirra hjóna. Þá hafði að minnsta kosti einn einstaklingur greinst með efnabruna vegna meltingatruflana Jóns.

„Ef fólk vissi bara hvað færi hér fram þá væri löngu búið að setja manninn á annað fæði, það er engin spurning,“ segir ónafngreindur nágranni þeirra hjóna í samtali við fréttastofu, sem jafnframt sagði ástandið í hverfinu vera áfellisdóm yfir eftirlitsstofnunum.