KVENNABLA&Eth;I&Eth;

„Nú eru kosningarnar búnar og almenningur má fara að fokka sér“

„Kosningar eru búnar. Nú þarf ég ekki að tala við þig frekar en ég kæri mig um auli!“

„Ég neita því ekki að þetta er búið að vera algjör snilld. Launin orðin geggjuð, ég búinn að fá greitt vel yfir þrjár milljónir síðan ég komst á þing og varla unnið handtak síðan,“ segir Halldór Grétarsson, nýkjörinn þingmaður í viðtali við fréttastofu í gær.

„Í fullri alvöru þá er ég búinn að sitja á rassgatinu, drekka kaffi og hlusta á Pírata rífast við Sjálfstæðismenn um eitthvað fjárlagafrumkjaftæði og kjara-eitthvað. Fyrir það fæ ég brjálæðislega vel borgað. Ég sé af hverju menn eins og Steingrímur J. hafa verið í þessu í 30 ár. Þetta er lífið!“ segir Halldór og það er ekki laust við að það hlakki í honum.

Við spurðum hann út í þau fjölmörgu erfiðu mál sem þó hafa verið til umræðu á þinginu og stjórnarmyndunarviðræðurnar, hvaða skoðun hann hefði á þeim. „Sko nú ert þú fjölmiðlamaður og ég lærði stjórnmál af þeim besta, sjálfum Sigmundi fokking Davíð Gunnlaugssyni, manni ársins ef þú spyrð mig, ég þarf ekkert að ræða við þig. Þú ert bara blaðamaður og sorp. Ég kalla bara á þig þegar ég þarf að koma einhverju á framfæri, þangað til máttu bara bíða við símann og skrifa um það sem er að gerast á Facebook,“ sagði Halldór eins viðkunnanlega og kyrkislanga í leit að kúri.

En finnst þér ekki sjálfsagt að almenningur fái að heyra sjónarmið þingmanna, nú hafa margir ljáð máls á því að þingið hafi flýtt sér um of við afgreiðslu mála til að komast örugglega í jólafrí, hver er þín skoðun á því?

„Kosningar eru búnar, þær eru aftur eftir fjögur ár. Þangað til má almenningur bara fokka sér.“